Mir sy e chlyne Familiebetrieb und hei dä Hof im Januar 2010 dörfe übernäh.

Üsi 11 Chüeh tüe im Winter, afangs Früehlig abchalbe und de faht die lustegi Zyt a mit de Chäubli. D’Miuch bringe mir y die sehr nöchi Chäserei, wo sy zu Chäs, Joghurt, Anke, Miuchdrinks oder Joghurt verarbeitet wird.
Mir tüe Söi meschte, löh se vor Metzgerei Nussboum z’Wichtrach lah schlachte und verchoufe ca. vier mau im Jahr Schwiinsfleisch diräkt ab Hof.

Rund um üse Betrieb hei mir öpis meh aus 60 Obstböim. Die wärde vom Lukas gschnitte, wenn nötig gsprützt und im Herbst ärntet är zäme mitem Markus die wunderbare Frücht. Die wärde fasch usschliesslech ab Hof verchouft oder diräkt a üsi Chunde glieferet. Meh über üsi Frücht erfahrtet dir unger „üsi Produkt“.

Jede Summer schicke mir e Chueh uf d’Alp y d’Ferie. Us dere wunderbare Miuch vo Alpechrüter gibt’s Aup- u Aup-Raclettechäs, wo mir uf üsem Betrieb abem Herbst tüe wyterpflege und später o diräkt verchoufe.