Ja, was dörfe mir fürne ungloubleche Früehlig erläbe. Scho afangs März isches extrem warm gsy und d’Natur het sech fürne nöie Summer afah zwäg mache. Uf üsere Höchi grad no rächtzitig isch aber du nomau Schnee cho. Und das de nid nume grad für ei Nacht. Es het meh Schnee gäh aus dr ganz Winter und dr Fynn het auso sogar no es Iglu boue …
Wenn me uf die Lüt im Dorf wott lose, wo scho chly meh Erfahrig ufem Buggu hei, de isches nid dr letscht Schnee gsy, wöu dä isch no viu z’wyt abe cho.
Itze isches wieder extrem warm und d’Natur isch fasch meh am Explodiere aus am Erwache. Vor däm Schnee hani no hurti Erbs gsetzt und itze glüsle die scho füre. D’Tulpe hingäge hei nid grad so Fröid a dere extreme Wärmi. Vorem Stöckli – wos sehr gschützt und hiub isch – heimer guet 20°.
U was isch de das Schöns? Eifach e Grasbitz … e Weid oder vilech e spezielli Mischig …
Nenei, das isch üses Brotgetreide, wo wunderschön am Wachse isch. Nach dr Härdöpfu-Ärnt im Herbst wird die Saat scho ustah und scho vorem Schnee chöme die Pflänzli und überläbe när die chaute Tage… es isch eifach immer wieder es Wunder und mir hei Fröid!
Und wöu hüt am Morge z’Tou so schön isch gsy, teileni no grad es paar Föteli.
Am Meiste Fröid hei natürlech d’Chüeh wenn sy wieder use chöi. Das isch jedes Jahr wieder es Highlight …
Dr Zwätschge-Boum faht o scho gly afah blüeie.
Hallo Family Gafner
Eifach Schön die Natur wo Gott het erschaffe…ig Wünsche dr Family Gafner äh Schöne Gsägnete Frühlig.
Liebs Grüessli vom Boumi us Uttige…
Apropos „dr Zwätscheboum faht o scho gly afah blüeie“. Är isch 2 Tag später scho y vouer Blüete 😉