Ig darf für d’EDU zu de Nationalratswahle aträtte, danke viu, viu mau für z’Vertroue!
Hie wirde ig öich chly verzeu, was so rund um d’Nationalratswahle 2023 louft. I fröie my mega uf die spannendi Zyt und by scho itze dankbar für Aues woni scho ha dörfe lehre, gseh und entdecke. Viu Spass bym „umeschnöigge“.
Wow, üses Bundeshuus, sogar vor Site wunderschön!
Am Mittwuch, 31. Mai 2023 isch dr Startalass zu de Wahle vom Berner Buureverband im Bundeshuus gsy. Was fürne Ehr, dass ig dert ha dörfe derby sy.
Es het viu Infos gäh und bym gmeinsame Apéro het me nöiy Lüt lehre kenne. Es sy ganz verschiedeni Parteie verträte – das isch super!
Einisch meh by ig extrem beidruckt vor Freiheit und dr Sicherheit i üsem Land. Säubverständlech wird me vorem Itritt i z’Bundeshuus kontrolliert und „dürlüüchtet“. Aber das ig nach däm Alass i dr Igangs-Haue eifach so no es paar Föteli ha chönne mache und me sech aus „Nobody-Bürger“ i üsem Regierigsgebäude frei cha bewege … wo gits das no?
Friede u Sicherheit – Sägesspure i üsem Land!
Itze geit’s los. Syt mitti Ouguscht weiss ig, dass ig uf dr Liste EDU Plus, Nr. 31 by und mys Kandidate-Numero isch 31.10.1 Faus dy das nid so intressiert – verstahni guet. Drum hie my Flyer, wo du chasch läse, was mir wichtig isch, was mir Sorge macht und für was ig my wett isetze – natürlech o im Läbe augemein und nid nume im Bundeshuus 😉 Jedes cha nämlech dert öpis bewürke, wos drinne steit!
