Aber natürlech erfahrsch hie scho no chly meh über my und das, wo mir ufem Härz liegt 🙂

I by vo ganzem Härze Mama vo vier wunderbare Kids zwüsche 12i und 17ni. Dr Familie- und Schueuautag isch mir auso völlig bekannt und o es grosses Härzensaliege. I wünsche mir, dass einersits d’Mama’s wo „nume“ daheime sy meh wärtgschetzt wärde und angersits, dass üsi Vouks-Schuele wieder e Ort dörfe wärde, wo meh Wüsse vermittlet wird und nid Erziehig muess nacheghout wärde.

Mit Liedeschaft by ig „d’Frou vom Buur“. Ig by nid am Morge und am Abe im Stau und hiufe nume ab und zue dusse mit. I mache gärn d’Buechhautig vo üsem Betrieb und überchume viu „Politisches“ mit. Ja, mängisch hets scho mit Liede z’tüe, wenn me 7 Tag ir Wuche für siner Tier muess sorge und me sech Ferie regurächt muess erstähle. Aber i by fest dervo überzügt, dass Buurefamilie ganz wichtig sy für üsi Gseuschaft und o y Zuekunft sötte gstärcht und ungerstützt wärde. (Chliny Randbemerkig: e grosse Teil vor Landwirtschaftspolitik wird im Nationalrat und nid im Grosse Rat gmacht).

z’Mandat aus Protokollfüehrerin bym Vorstand vor Spitex Zulg git mir e chliine, aber doch ufschlussriiche Iblick y d’Berner Gsundheitspolitik. Dr Samariterverein im Dorf isch mir wichtig und ig ha dert z’Vorstandsämtli vor Sekretärin. Für d’Berggnosseschaft darf ig d’Kassierin sy und das scho syt meh aus 10 Jahr. Im letschte Früehlig hani mys Ämtli aus Sekretärin vor Buurevereinigung Thun nach meh aus 10 Jahr abgäh.

z’Schaffe im Chäsilädeli im Homberg söu Usdruck sy vo däm, dass mir z’Dorf wichtig isch und e grosse Lohn nid immer z’Wichtigste isch 🙂 Dr Kontakt mit de Chunde schätze ig sehr!

I mire Freizyt biny mega gärn dusse. Wandere, jogge oder e Spazieregang mitere Fründin – da cha ig uftanke!

Us vouer Überzügig kandidiere ig für d’EDU. O wenn’s nid im Name steit isches für üs EDU-ler zu 100% klar, dass mir uf d’Wärte vor Bibu setze. Und i gloube dra, dass die christleche Wärte o y Zuekunft z’beste Fundamänt wärde sy für üsi Gseuschaft!