Wow, dr Ouguscht isch da! Dä Monet, wo d’Schueu wieder afaht, wo Schueuching zu Lehrlinge wärde, wo Lehrer vor nöiy Klasse stöh …
… und d’Buure vou am Ärnte sy!
Letscht Wuche, am 8. Ougschte, isches wieder sowyt gsy. Dr Mäidröscher isch cho!
Das isch jedes Jahr wieder es Highlight. Wenn die grossi Maschine die Ähri schnitt und drin inne die Ähri „gschüttlet“ wärde und me eifach cha zueluege, wie usem grosse Rohr Chörner chöme und hinger use wunderbars Strou.
Mir sy das Jahr ganz bsungers dankbar für die wunderbar gueti Ärnt. Ändi Mai hets ja meega fest grägnet, när isches zersch lang troche und heiss gsy und nach däm de o wieder langi Zyt relativ chüeu u nass. Aber dr Natur schiint das z’gfaue – oder mir nähs aus Säge vomne wunderbare Schöpfergott wo siny Hang über üsne Fäuder het.
Und wöu Ärntezyt isch hei mir ab sofort:
- Härdöpfu
- Zwätschge
- reine Claude
- diversi Öpfu
Mäudet nech eifach by üs, wenn dir Öpis bruuchet, mir fröie üs!