Scho wieder sy 2 Monet verby und s’isch ziemlech viu gange … wo mir hie gärn chly tüe verzeue!
Danke em grosse Engagement vor Cornelia und em Markus Gafner hei mir hüür fasch keni Schäde vor Kirsch-Essig-Flöige gha. Mit säubergmachte Faue hei mir z’1000 ige vo dene Viecher chönne ifah und so üsi Chirschi schütze. Es het e wunderbari Ärnt gäh, wo mir zumne grosse Teil o übere Swiss Hof z’Heiligeschwändi hei dörfe verchoufe – isch übrigens e Bsuech wärt 🙂
i
Und scho am 31. Juli hei mir üses wunderbare Brotgetreide dörfe drösche. Was fürne Säge! E riese Ertrag und mir fröie üs scho itze uf das feine Mäu und die feine Sache wos da drus git. Mittlerwile isch o scho aues Strou i dr Bühni wo mir wieder zum Iströie vo üsne Tier chöi bruuche. Dr Mist isch ustah worde und es sy scho wieder Gras-Sämli im Bode …
Itze widme mir üs scho wieder de Härdöpfu. Ab sofort chöit dir üsi Früehsorte „Agatha“ ha, ab endi Ouguschte sy de o wieder d’Sorte „Désirée“, „Laura“ und „Erika“ z’ha.