Me isch scho wieder nid truurig, wenns mau es paar Grad chüehler isch und me grad wieder mau Zyt het, hie es paar Ziele festz’haute.
Mir hei letscht Wuche e wunderbari Heuärnt dörfe itue und hei so itze grad chly e Pouse. Wöu itze aui Buure ihre Dünger – auso Bschütti 😉 – am ustue sy, isches grad bsungers schön, wenn me Holunderblüete cha abläse und verarbeite …
Dr Weize und d’Härdöpfu sy schön am Wachse und hoffe natürlech itze de o uf chly Räge und mir bätte, dass dä Räge de o ohni Hagu chunnt. Ja, u leider hets tatsächlech scho wieder Härdöpfu-Chäfer und sy hei o scho Eier gleit… Mir gäh wieder Aues, dass mir se verwütschte bym „Zäme-läse-mitem-Chübeli“…
Mir fröie üs sehr, dass üsi viele Böim o das Jahr wieder wunderschön blüeit hei. Chirschi, Öpfu, Bire, Mirabelle, Zwätschge und Reine Claude; aues het mega schön aghänkt. Ines paar Tag chöi mir de scho die erschte Chirschi abläse.
Das wärde mir sicher ufe Status tue.
Gärn darfsch du dy o scho itze mäude, wenn du Inträsse hesch!
