Ja, itze isch e wunderbari Zyt. Mir gniesses dörfe zuez’luege wie d’Härdöpfu wunderbar wachse und o scho die erschte Frücht – d’Chirschi – riif wärde.
Leider kämpfe aber o mir mit Schädlinge. I däm Biitrag näh mir öich mit, wie mir dermit wei umgah.
Syt ca. drü Wuche louft d’Delila 2-3 mau ir Wuche dür z’Härdöpfufäud und probiert aui Chäfere mit streife ufem Rügge z’entdecke. Die wärde nämlech igsammlet und müesse de leider stärbe.
Zwar würd dä Härdöpfuchäfer üs ne Pflanze nid viu mache, aber dä 50 – 170 Gramm schwär Chäfer leit pro Tier ca. 1’200.00 Eier a d’Ungersite vo de Härdöpfustude ab. Die Eier entwickle sech innerhaub vo wenige Täg zu Larve und die wiederum frässe när d’Härdöpfustude so richtig kahl.
Das wott natürlech niemer. Wenn d’Schadensschwelle z’höch isch, chöi mir es Gsuech steue und när die Chäfer sprütze. Das wei mir aber wenn irgendwie möglech verhindere wöu mir gaaanz viu natürlechi, schöni Häufer by üsere Arbeit ufem Fäld hei. Es isch jedesmau e grossi Fröid wenn mir eis vo dene viune Himmugüegeli dörfe entdecke. Die sy nämlech nid nume schön, sondern sy frässe d’Eier vo Chäfere. Und wenn mir üses Fäud mit Insektizid sprütze, wärde o sy stärbe.
Itz fragsch du dy vilech wieso mir üs die Frage de überhoupt steue, ob mir Insektizid isetze oder nid, wenn me ja die Stude sowieso scho gly mäit. Wenn me d’Azau vo dene Larve und schlussändlech vo de Chäfer nid i Griff überchunnt, wirds jedes Jahr schlimmer u das muess verhinderet wärde. Es geits auso immer o um d’Fougejahr.
Wenn me scho grad dür z’Fäud louft, probiert me o no grad z’Gjät- Gluuri und Winde – usz’riisse. Geit ja no grad im Gliiche, solangs nid grösser isch 🙂
E wytere, sehr schlimme Schädling isch d’Kirschessigflöige, wo’s syt es paar Jahr git und wome nid cha bekämpfe, wöu das chliine, fiise Flöigeli ersch y z’Chirschi (oder o Beeri) sticht, wenns riif isch. Es leit es Ei i d’Frucht und die Frucht überchunnt när ganz e suure Gschmack, äbe wie essig. Im Gägesatz zur Chirschiflöige macht sy äbe nid „nume“ e Wurm, sondern z’Chirschi wird ungniessbar suur. Tue dy mau achte, wenn du näbeme Chirschiboum verby loufsch. Mängisch tropfe die Böim sogar und me schmöckt dr Essiggschmack 🙁
U de isches eifach wunderbar, wenn me so e tolli Grossfamilie het, wo eim hiuft. d’Chirschiärnt isch definitiv es Familieprojekt.
D’Cornelia mixet e Cocktail, wo die Flöige gärn het. Chliini Petfläschli überchöme när Lööchli und wärde mit däm Gmisch abgfüllt. Markus platziert die Fläschli im Boum und när hoffe mir, dass möglechst viu Flöigeli dä Gschmack no besser finge und lieber dert dri göh aus i üsi Chirschi. Wie dir gseht, finge sehr viu dr Wäg i die Faue…
… aber leider nid aui. Vom erste Boum wo mir i däm Jahr hei chönne ärnte hei mir meh aus 3/4 vo de Frücht nid chönne vermarkte wäge däm Insekt. … es isch würklech schlimm.
G’ärntet wärde d’Chirschi vo Lukas und Markus, erläse und z.B. y SwissHof bracht meistens vor Delila.
Mir sy vou i dr Chirschi-Ärnt. Itze sy die Rote dranne, und nachere wytere, „normale“ Sorte chöme de no die „chliine Schwarze“, wo eifach e Troum sy für Chueche und Konfi. Die wärde mir nume grob sortiere und de o biuiger verchoufe. Wenn du Inträsse hesch, darfsch dy gärn by üs mäude! By de Produkt – Frücht fingsch du es Kontaktformular oder du mäudsch dy per Whatsapp oder Telefon.