Düre Winter git’s by üs nid so viu z’brichte. Was aber gar nid öpe heisst, dass mir weniger mache 🙂 Dr Lukas isch näbst de Stauarbeite viu ungerwägs i Chundegärte oder i de Hostete vo angerne Buure. Dert wärde Strüücher u Gräser gschnitte und d’Obstböim wärde wieder so gschnitte, dass sy „schön“ usgseh u d’Chraft nid i unnötige Wassergschoss verlore geit.
Und natürlech gits düre Winter im Büro ou ziemlech viu z’tüe. d’Delila luegt, dass aui Rächnige per 31. Dezember zaut sy und dr Abschluss möglechst i de erschte Wuchene vom Jahr cha gmacht wärde. Mängisch chunnts haut de vor, dass e Abschluss vomne Verein oder ere Gnosseschaft grad zersch chunnt u de muess dä vom Betrieb haut warte.
Dernäbe fahrt dr Lukas ca. 3 mau düre Winter uf Adubode für dert no Härdöpfu z’verchoufe. Die gits o im Swisshof z’Heiligeschwändi oder natürlech diräkt by üs ab Hof.